MATUMAINI YA CHUO/BASRA YAFIFIA KUCHEZA LIGI KUU ZANZIBAR.

Bao la dakika ya 89 la mchezaji Chedy Francis wa Dangers Boys ndilo lililoinyima timu ya Chuo/Basra kupata nafasi ya kucheza ligi kuu ya Zanzibar msimu ujao, baada ya kujikuta wakichapwa mabao 4-3 katika mchezo wa ligi Daraja la kwanza Taifa Pemba uliochezwa uwanja wa Gombani.

Timu ya Basra iliyokuwa ikihitaji kupata sare ya aina yeyote ile katika mchezo huo walijikuta wakinyong`onyewa na miguu baada ya kuingia bao hilo ambapo hadi katika dakika ya 85 walikuwa wakiongoza kwa magoli 3-2.

Kiujumla mchezo mzima ulikuwa wa vuta nikuvute tangu pale mwamuzi Hassan Abdalla Gerei ilipopuliza kipenga cha kuashiria kuanza kwa mchezo huo, uliochukua kiasi sekunde 10 tu kwa timu ya Danger Boys kujipatia bao la kwanza lilifungwa na mchezaji wake Chedy Francis.

Bao hilo unaweza kusema kama halikuwatia simanzi wachezaji na mashabiki wa Chuo/Basra kwani walijipanga kuanza kusukuma mashambulizi ya kulikomboa goli hilo, na ndipo katika dakika ya 31 Moh`d Salim alipoisawazishia timu yake bao hilo.

Dakika 6 baadaye yaani dakika ya 37 Chum Ali Haji aliweza kuiandikia timu yake ya Chuo/Basra bao la pili baada kuusindikiza wavuni mpira akipokea pasi safi kutoka kwa winga wa kulia wa timu hiyo Juma Chuma.

Hata hivyo kabla ya mashabiki wa Chuo/Basra hawajakaa chini vizuri baada ya kushangilia bao hilo, Chedy Francis wa aliisawazishia timu yake ya Danger Boys bao la pili, lakini Mkwaju uliotokana na adhabu uliopigwa kwa ustadi na Vuai Maulid katika dakika ya 42 uliwapeleka mapumziko Chuo/Basra wakiwa na mabao 3 dhidi ya 2 ya Danger Boys.

Ikiwa mashabiki waliowengi waliofika uwanjani hapo kushughudia mchezo huo wakidhani kuwa tayari Basra imeshaondoka na ushindi wa alama 3 uwanjani hapo na kushika nafasi ya pili mchezaji Makame Sharrif Hamdu aliweza kuisawazishia timu yake ya Danger Boys goli la 3 na kuzusha shangwe kubwa kwa mashabiki waliokuwepo uwanjani.

Shangwe na kitimtim zilizuka baada ya Chedy Francis kuifungia timu yake ya Dangers Boys bao la 3 katika dakika ya 89, na hadi mchezo huo unamalizika Danger Boys 4 Chuo/Basra 3.

Katika mchezo mwengine wa ligi hiyo uliochezwa kwenye uwanja wa Ngerengere baina ya timu ya Wawi Star na New Star, timu ya New iliibuka na ushindi wa magoli 4-0.

Kwa matokeo hayo timu ya Danger waliofikisha alama 7 wanaungana na Wawi Star waliofikisha alama 10 na New Star waliofikisha Alama 7 kupanda daraja na kucheza ligi kuu msimu ujao.

Wakati huo huo ligi kuu ya Zanzibar kanda ya Pemba inatarajiwa kuanza leo katika viwanja vitatu ambapo katika uwanja wa Finya FFU Aljazira watakuwa na Kizimbani, Yong Islanders watasafiri hadi Kangani kuvaana na African Kivumbi.

Huku macho na masikio yote yakielekezwa kwa wakongwe wanaotamba katika soka hapa kisiwani Pemba timu ya Jamhuri ya Wete watakapo oneshana cheche na wagongwe wenzao wa Chipukizi ya Chake Chake kwenye uwanja wa Gombani.