JKU YAWANYESHEA MVUA YA WIKI MTENDE

Timu ya Jeshi la Kujenga Uchumi Zanzibar JKU, imewanyeshea mvua timu ya Mtende kwa kutoa kipigo kizito cha mabao 7-1, katika mchezo wa ligi kuu ya Zanzibar kanda ya Unguja uliovurumishwa  ndani ya dimba la Amani mjini Unguja.

Katika kipigo hicho mabao ya JKU yamefungwa na Moh’d Abdalla dakika ya 23 na 4o, Emanuel Martin dakika ya 33 na 48, Ismail Khamis dakika ya 37, Mbarouk Chande dakika ya 50, na aliyemaliza karamu hiyo ya magoli ni Edward Petter aliyefunga  katika dakika ya 75.

Mtende walijipatia bao la kufutia machozi lililofungwa na Humud Abdalla mnamo dakika ya 70 ya mtanange huo.

Timu ya Mtende ishapokea kichapo cha mabao 13 katika msimu huu kutoka kwa JKU, ambapo wamekutana mara mbili, katika mzunguko wa mwanzo walikutana tarehe 26, Disemba mwaka jana na walicharazwa mabao 6-0, na mzunguko wa pili wamechezea kipigo hicho cha mabao 7-1, hivyo kufanya jumla ya mabao 13 kufungwa na JKU.

JKU bado wameendelea kukaa kileleni wakiwa na alama 50 sasa, na Mtende wameendelea kukaa mkiani wakiwa na alama kumi 10 katika msimamo wa ligi kuu ya Zanzibar kanda ya Unguja.