KUMEKUCHA LIGI KUU YA ZANZIBAR KANDA YA UNGUJA, NA HUKO PEMBA KUANZA RASMI LEO HII.

Baada ya mapumziko mafupi ya ligi kuu ya Zanzibar kanda ya Unguja, ligi hiyo itaendelea kutimua vumbi leo katika uwanja wa  mini Unguja  majira ya saa kumi za jioni.

Katika mchezo wa leo timu ya kikosi cha Jeshi la Kujenga Uchumi Zanzibar (JKU), wataingia dimbani kuvaana na timu ya kikosi cha  Polisi Zanzibar.

JKU wataingia uwanjani wakiwa wanaongoza ligi hiyo na alama zao 32, lakini kwa upande wa Polisi wao wataingia uwanjani wakiwa wanaburuta mkia na wana alama nane (8).

Wakati huo huo huko kisiwani Pemba kwa upande wa ligi kuu ya Zanzibar kanda ya Pemba leo inatarajiwa kuanza rasmi kisiwani humo.

Ligi kuu kwa upande wa Pemba ilisimama muda mrefu kutokana na figisu figisu za soka  na leo ligi hiyo itaaza kuchezwa katika viwanja mbalimbali vya kisiwani Pemba.

Katika ligi hiyo michezo mitatu itachezwa katika viwanja mbalimbali, ambapo katika uwanja wa Gombani, Jamhuri watacheza na Chipukizi, katika uwanja wa Finya, Aljazira wataumana na Kizimbani na katika dimba la Kangani Skuli, Afrika Kivumbi watavaana na Yanga Islander.

kumbuka hiyo ni ligi kuu ya Zanzibar kanda ya Unguja na kanda ya Pemba, hivyo si ya kukosa fika kiwanja kilicho karibu nawe ili ujionee kandanda safi visiwani hapa.